രാജ്യത്ത് ഏഴ് സംസ്ഥാനങ്ങളിൽ പക്ഷിപ്പനി സ്ഥിരീകരിച്ചു

ന്യൂഡൽഹി: രാജ്യത്ത് ഏഴ് സംസ്ഥാനങ്ങളിൽ പക്ഷിപ്പനി സ്ഥിരീകരിച്ചു. കേരളം, രാജസ്ഥാൻ, മധ്യപ്രദേശ്, ഹിമാചൽപ്രദേശ്, ഹരിയാന, ഗുജറാത്ത്, ഉത്തർപ്രദേശ് എന്നിവിടങ്ങളിലാണ് പക്ഷിപ്പനി സ്ഥിരീകരിച്ചത്.

ഛത്തീസ്ഗഢിലും മഹാരാഷ്ട്രയിലും കോഴികൾ അസാധാരണമായ നിലയിൽ ചാവുന്നത് ശ്രദ്ധയിൽപ്പെട്ടതിനെ തുട‍ർന്ന് പക്ഷികളുടെ സാമ്പിളുകൾ പരിശോധനയ്ക്കായി അയച്ചിട്ടുണ്ട്. ഏഴ് സംസ്ഥാനങ്ങളിൽ ഇതുവരെ രോഗം സ്ഥിരീകരിച്ചിട്ടുണ്ട്. രോഗം കൂടുതലായി പടരാതിരിക്കാൻ ദുരിതബാധിത സംസ്ഥാനങ്ങൾക്ക് ഉപദേശം നൽകിയിട്ടുണ്ടെന്ന് ഫിഷറീസ്, മൃഗസംരക്ഷണ, ക്ഷീരകർഷക മന്ത്രാലയം പ്രസ്താവനയിൽ പറഞ്ഞു.

കേരളത്തിൽ കോഴിപ്പനി സ്ഥിരീകരിച്ച കോട്ടയം, ആലപ്പുഴ ജില്ലകളിൽ പക്ഷികളെ കൊന്നൊടുക്കുന്ന ജോലി പൂർത്തിയായി. മോണിറ്ററിംഗ് / എപ്പിഡെമോളജിക്കൽ അന്വേഷണത്തിനായി കേന്ദ്ര ടീമുകൾ കേരളം, ഹരിയാന, ഹിമാചൽ പ്രദേശ് എന്നിവിടങ്ങളിൽ എത്തി. രോഗത്തെ കുറിച്ച്‌ ജാഗ്രത പുലർത്തുന്നതിനും ആരോഗ്യപ്രവർത്തകരുമായി ഫലപ്രദമായ ആശയവിനിമയവും ഏകോപനവും ഉറപ്പുവരുത്താനും മനുഷ്യർക്ക് രോഗം പടരാനുള്ള സാധ്യത ഒഴിവാക്കാനും കേന്ദ്രം സംസ്ഥാന സർക്കാരുകളോട് ആവശ്യപ്പെട്ടിട്ടുണ്ട്.

ജലാശയങ്ങൾ, തത്സമയ പക്ഷി വിപണികൾ, മൃഗശാലകൾ, കോഴി ഫാമുകൾ എന്നിവയ്ക്ക് ചുറ്റും നിരീക്ഷണം വർദ്ധിപ്പിക്കാനും ചത്ത പക്ഷികളെ ശരിയായ രീതിയിൽ നീക്കംചെയ്യുന്നത് ഉറപ്പാക്കാനും കോഴി ഫാമുകളിൽ ജൈവ സുരക്ഷ ശക്തിപ്പെടുത്താനും സംസ്ഥാനങ്ങളോട് ആവശ്യപ്പെട്ടിട്ടുണ്ട്. ഏവിയൻ ഇൻഫ്ലുവൻസയുടെ ഏത് സാഹചര്യത്തിനും തയ്യാറാകണമെന്നും പി‌പി‌ഇ കിറ്റുകളും സാധന സാമഗ്രികളും ആവശ്യത്തിനുണ്ടെന്ന് ഉറപ്പുവരുത്താനും കേന്ദ്ര സർക്കാർ ആവശ്യപ്പെട്ടിട്ടുണ്ട്.