കാർട്ടൂണിസ്റ്റ് ബാദുഷ അനുസ്മരണവും അന്താരാഷ്ട്ര കാരിക്കേച്ചർ, കാർട്ടൂൺ പ്രദർശനവും

കൊച്ചി : കാർട്ടൂണിസ്റ്റ് ബാദുഷ അനുസ്മരണവും കാർട്ടൂൺ, കാരിക്കേച്ചർ പ്രദർശനവും എറണാകുളം ഇടപ്പള്ളിയിലെ ചങ്ങമ്പുഴ പാർക്കിൽ സംഘടിപ്പിക്കും. ജൂൺ 2 ന് രാവിലെ 9.30 മുതലാണ് പരിപാടി സംഘടിപ്പിക്കുന്നത്. അന്താരാഷ്ട്ര കാരിക്കേച്ചർ കാർട്ടൂൺ പ്രദർശനം കൊച്ചി മേയർ അഡ്വ.എം.അനിൽകുമാർ ഉദ്ഘാടനം ചെയ്യും. മുതിർന്ന കാർട്ടൂണിസ്റ്റുകളായ ബാലചന്ദ്രൻ , അരവിന്ദൻ , പ്രസന്നൻ ആനിക്കാട് , സജ്ജീവ് ഉൾപെടെ കേരളത്തിലെ പ്രശസ്ത കാർട്ടൂണിസ്റ്റുകൾ പങ്കെടുക്കുന്ന പരിപാടിയിൽ ,എറണാകുളം ഡെപ്യൂട്ടി കളക്ടർ (ഡി.എം.) വൃന്ദാ മോഹൻദാസ്‌,ജി സി ഡി എ ചെയർമാൻ ചന്ദ്രൻ പിള്ള, കേരള ലളിതകലാ അക്കാദമി സെക്രട്ടറി എൻ.ബാലമുരളീകൃഷ്ണൻ,വാർഡ്‌ കൌൺസിലർ ശാന്താ വിജയൻ, ചിത്രകാരിയും വ്യവസായ സംരംഭകയുമായ ഷീലാ കൊച്ചൌസേഫ്,കാലടി സംസ്കൃത സർവ്വകലാശാല മുൻ വൈസ് ചാൻസലർ ഡോ. എം സി ദിലീപ് കുമാർ, പ്രശസ്ത പത്രപ്രവർത്തകനും കോളമിസ്റ്റുമായ മാധവൻകുട്ടി നന്ദിലേത്ത്, പ്രശസ്ത ഛായാഗ്രാഹകനും ഫോട്ടോഗ്രാഫറുമായ മഹാദേവൻ തമ്പി, പ്രശസ്ത ഫോട്ടോ ജേർണലിസ്റ്റ് ജിതേഷ് ദാമോദർ തുടങ്ങിയ പ്രമുഖർ വിശിഷ്ടാതിഥികളായി പങ്കെടുക്കും. പരിപാടിയിൽ ചിത്ര-കാർട്ടൂൺ രചന മത്സരത്തിൽ പങ്കെടുത്ത കുട്ടികൾക്കുള്ള സമ്മാനദാന ചടങ്ങും നടത്തും.

പ്രദർശനത്തിൽ കാർട്ടൂൺമാൻ ബാദുഷയുടെ രചനകളും വിദേശത്തും ഇന്ത്യയിലുമുള്ള വിവിധ കാരിക്കേച്ചറിസ്റ്റുകൾ ബാദുഷയെ വരച്ച രചനകളും പ്രദർശിപ്പിക്കും. ഇതോടൊപ്പം കേരളത്തിന്റെ വിവിധ ദേശങ്ങളിൽ നിന്നുള്ള കാരിക്കേച്ചറിസ്റ്റുകൾ പ്രദർശനം സന്ദർശിക്കുന്ന എല്ലാപേർക്കും കാരിക്കേച്ചറുകൾ സൗജന്യമായി വരച്ചു നൽകും. ഇക്കഴിഞ്ഞ മേയ് 14 ന് പനമ്പിള്ളി നഗർ ലോറം അങ്കണത്തിൽ ഭിന്ന ശേഷിക്കാരായ കുട്ടികൾക്കുള്ള പ്രത്യേക പരിപാടിയും ഭിന്നശേഷിയുള്ളവരുടെ ജീവിതവുമായി ബന്ധപ്പെട്ട ഇരുപതടി നീളത്തിലുള്ള ബിഗ്‌ കാൻവാസ് ഡൂഡിൽ വിസ്മയത്തോടെയുമാണ് ബാദുഷ അനുസ്മരണ പരിപാടിയായ കാർട്ടൂൺമാൻ ജൂൺ 2 ന് സമാരംഭമായത്. കാർട്ടൂൺ കലാകാരന്മാരുടെ കൂട്ടായ്മയായ കാർട്ടൂൺ ക്ലബ് ഓഫ് കേരളയും കുട്ടികൾക്കും രക്ഷിതാക്കൾക്കും അദ്ധ്യാപകർക്കുമായി നിലകൊള്ളുന്ന സന്നദ്ധ സംഘടനയായ പെറ്റൽസ് ഗ്ലോബ് ഫൌണ്ടേഷനും ലോറം വെൽനസ് കെയറിൻറെയും ലേൺവെയർ കിഡ്സിൻറെയും സി എസ് ആർ ഡിവിഷനുകളും ഒത്തു ചേർന്നാണ് പരിപാടി സംഘടിപ്പിക്കുന്നത്.

കൂടുതൽ വിവരങ്ങൾക്ക് ദയവായി 81370 33177 എന്ന നമ്പറിൽ ബന്ധപ്പെടാവുന്നതാണ്.