കോടിയേരി ബാലകൃഷ്ണൻ്റെ ഭാര്യ വിനോദിനിക്ക് കസ്റ്റംസ് നോട്ടീസ്

സിപിഐഎം പോളിറ്റ് ബ്യൂറോ അംഗം കോടിയേരി ബാലകൃഷ്ണൻ്റെ ഭാര്യ വിനോദിനിക്ക് കസ്റ്റംസിൻ്റെ നോട്ടീസ്. സന്തോഷ് ഈപ്പൻ നൽകിയ ഐ ഫോൺ വിനോദിനിക്ക് ലഭിച്ചത് എങ്ങനെയെന്ന് അന്വേഷിക്കുന്നതിൻ്റെ ഭാഗമായാണ് കസ്റ്റംസ് നോട്ടീസ്. വരുന്ന ബുധനാഴ്ച വിനോദിനിയോട് കസ്റ്റംസിന്റെ കൊച്ചി യൂണിറ്റിൽ ഹാജരാകണമെന്നാണ് നിർദേശം നൽകിയിരിക്കുന്നത്. ലൈഫ് മിഷൻ പദ്ധതിയുമായി ബന്ധപ്പെട്ട് അഞ്ച് ഐഫോണുകളാണ് സന്തോഷ് ഈപ്പൻ വാങ്ങിയിരുന്നത്. ഇതിൽ ഏറ്റവും വിലകൂടിയ ഐഫോണാണ് വിനോദിനി ബാലകൃഷ്ണൻ ഉപയോഗിച്ചിരുന്നതെന്നാണ് കസ്റ്റംസ് കണ്ടെത്തൽ. ഐഎംഇഐ നമ്പർ ഉപയോഗിച്ച് നടത്തിയ പരിശോധനയിലാണ് കണ്ടെത്തൽ.

സ്വർണക്കടത്ത് കേസ് വിവാദമായതോടെ ഫോൺ കൈമാറുകയായിരുന്നുവെന്നാണ് കസ്റ്റംസ് നൽകുന്ന വിവരം. ഫോൺ ഇപ്പോൾ ഉപയോഗിക്കുന്നയാളെയും വിനോദിനെയും ഒരുമിച്ചിരുത്തിയാകും കസ്റ്റംസ് ചോദ്യം ചെയ്യുകയെന്നാണ് വിവരം.