കേരളം ഡെങ്കിപ്പനി മരണങ്ങളില്‍ ഏറ്റവും മുന്നില്‍

തിരുവനന്തപുരം: ഡെങ്കിപ്പനി മൂലമുള്ള മരണങ്ങള്‍ ആരോഗ്യരംഗത്ത് കേരളം നേടുന്ന നേട്ടങ്ങള്‍ക്ക് തിരിച്ചടിയായി. രാജ്യത്ത് ഈ വര്‍ഷം ഏറ്റവുമധികം പേര്‍ ഡെങ്കിപ്പനി ബാധിച്ചു മരിച്ചത് കേരളത്തിലാണെന്ന് വ്യക്തമാക്കുന്ന കണക്കുകള്‍ കേന്ദ്ര ആരോഗ്യ മന്ത്രാലയം പുറത്തുവിട്ടു.കേന്ദ്ര ആരോഗ്യ മന്ത്രാലയം പുറത്തു വിട്ടത് ഡെങ്കിപ്പനി നേരിടുന്നതിനുള്ള ശ്രമങ്ങള്‍ ഫലപ്രദമായില്ലെന്ന് വ്യക്തമാക്കുന്ന കണക്കുകളാണ്.16 പേരാണ് ഈ വര്‍ഷം ഇതുവരെ സംസ്ഥാനത്ത് ഡെങ്കിപ്പനി ബാധിച്ച് മരിച്ചത്.3486 ഡെങ്കിപ്പനി കേസുകള്‍ സംസ്ഥാനത്തു നിന്ന് റിപ്പോര്‍ട്ട് ചെയ്തതായും കേന്ദ്ര സര്‍ക്കാര്‍ കണക്കുകള്‍ വ്യക്തമാക്കുന്നു.

കേരളത്തിനു തൊട്ടുപിന്നിലുള്ളത് 13 പേര്‍ മരിച്ച കര്‍ണാടകയാണ്.എന്നാല്‍ കര്‍ണാടകയില്‍ 14139 കേസുകള്‍ റിപ്പോര്‍ട്ട് ചെയ്തിരുന്നെങ്കിലും മരണസംഖ്യ 13ല്‍ പിടിച്ചു നിര്‍ത്താനായത് നേട്ടമായി. മൂന്നാം സ്ഥാനത്ത് 12 പേര്‍ വീതം മരിച്ച മഹാരാഷ്ട്രയുമും കര്‍ണാടകയുമുണ്ട്. മഹാരാഷ്ട്രയില്‍ 9899 കേസുകളും ഗുജറാത്തില്‍ 8410 കേസുകളുമാണ് റിപ്പോര്‍ട്ട് ചെയ്തത്.

ഈ വര്‍ഷം ജനുവരി മുതല്‍ ഒക്ടോബര്‍ വരെയുള്ള ഡെങ്കിപ്പനി ബാധയുടെ കണക്കുകളാണ് പുറത്തു വന്നിട്ടുള്ളത്.കഴിഞ്ഞ വര്‍ഷം സംസ്ഥാനത്ത് 4090 ഡെങ്കിപ്പനി കേസുകളാണ് റിപ്പോര്‍ട്ട് ചെയ്തത്. ഇതില്‍ 32 പേര്‍ മരിക്കുകയും ചെയ്തിരുന്നു. 2017ലാണ് സംസ്ഥാനത്ത് ഏറ്റവുമധികം പേര്‍ ഡെങ്കിപ്പനി ബാധിച്ച് മരിച്ചത് – 165 പേര്‍. ആ വര്‍ഷം 21993 കേസുകളായിരുന്നു സംസ്ഥാനത്ത് റിപ്പോര്‍ട്ട് ചെയ്യപ്പെട്ടത്. 2016ല്‍ 7218 പേര്‍ക്ക് സംസ്ഥാനത്ത് ഡെങ്കി ബാധിക്കുകയും 21 പേര്‍ മരിക്കുകയും ചെയ്തിരുന്നു.

അതേസമയം, മുന്‍വര്‍ഷങ്ങളുമായി താരതമ്യം ചെയ്യുമ്പോള്‍ സംസ്ഥാനം ഡെങ്കിപ്പനി നേരിടുന്നതില്‍ വിജയിച്ചു എന്നാണ് ആരോഗ്യ സര്‍വീസ് ഡയറക്ടര്‍ ഡോ. ആര്‍ എല്‍ സരിത അവകാശപ്പെട്ടത്. നിലവിലെ നിരീക്ഷണസംവിധാനം ഫലപ്രദമായതിനാല്‍ ഡെങ്കി കേസുകളെല്ലാം റിപ്പോര്‍ട്ട് ചെയ്യപ്പെടുന്നുണ്ടെന്നും അവര്‍ വ്യക്തമാക്കി. രോഗനിയന്ത്രണത്തിനുള്ള സംവിധാനങ്ങളും മികച്ചതാണെന്നും ഡോ. ആര്‍ എല്‍ സരിത പറഞ്ഞു. എന്നാല്‍ ചില സാഹചര്യങ്ങളില്‍ ഒരേ സമയം ഒന്നിലധികം അസുഖങ്ങള്‍ ഉണ്ടാകുന്നത് മരണകാരണമാകാറുണ്ടെന്ന് അവര്‍ ചൂണ്ടിക്കാട്ടി. ചില സമയത്ത് പനി ഹെമറേജിനു കാരണമാകുന്നതാണ് മരണത്തിലേയ്ക്ക് നയിക്കുന്നതെന്നും ഈ മരണങ്ങളുടെ കാരണം ഡെങ്കി മാത്രമാകണമെന്നില്ലെന്നും ഡോ. സരിത ചൂണ്ടിക്കാട്ടി.

91,457 ഡെങ്കിപ്പനി കേസുകളാണ് രാജ്യത്ത് ഈ വര്‍ഷം ഇതുവരെ റിപ്പോര്‍ട്ട് ചെയ്യപ്പെട്ടത്.പശ്ചിമ ബംഗാള്‍ മാത്രമാണ് ഒരാള്‍ക്കു പോലും ഡെങ്കിപ്പനി റിപ്പോര്‍ട്ട് ചെയ്യാത്ത ഒരേയൊരു സംസ്ഥാനം.ഈ വര്‍ഷം 82 ഡെങ്കിപ്പനി മരണങ്ങള്‍ രാജ്യത്ത് റിപ്പോര്‍ട്ട് ചെയ്തിട്ടുണ്ട്.