ഡോളർ കടത്ത് കേസ്; സന്തോഷ് ഈപ്പൻ അറസ്റ്റിൽ

ഡോളർ കടത്ത് കേസിൽ യൂണിടാക് എം ഡി സന്തോഷ് ഈപ്പൻ അറസ്റ്റിൽ. കസ്റ്റംസാണ് സന്തോഷ് ഈപ്പനെ അറസ്റ്റ് ചെയ്തത്. ഇന്ന് രാവിലെ ചോദ്യം ചെയ്യാനായി കസ്റ്റംസ് ഓഫീസിൽ വിളിച്ചുവരുത്തിയിരുന്നു. ഇത് രണ്ടാം തവണയാണ് സന്തോഷ് ഈപ്പനെ നോട്ടീസ് നൽകി വിളിച്ചുവരുത്തുന്നതും ചോദ്യം ചെയ്യുന്നതും.

അറസ്റ്റ് രേഖപ്പെടുത്തിയതിന് ശേഷം സന്തോഷ് ഈപ്പനെ മെഡിക്കൽ പരിശോധനയ്ക്കായി ആശുപത്രിയിലേക്ക് കൊണ്ടുപോയിരിക്കുകയാണ്. അതിന് ശേഷം കോടതിയിൽ ഹാജരാക്കും. ലൈഫ് മിഷൻ ഇടപാടിലെ കോഴപ്പണമാണ് ഡോളറാക്കി വിദേശത്തേക്ക് കടത്തിയത് എന്നാണ് കസ്റ്റംസ് കണ്ടെത്തൽ. ഡോളർ കടത്തുമായി ബന്ധപ്പെട്ട് കൃത്യമായ പങ്ക് സന്തോഷ് ഈപ്പനുണ്ട് എന്നും കസ്റ്റംസ് പറയുന്നു. വിദേശത്ത് കടത്താനായി ഡോളർ സ്വരൂപിച്ചത് സന്തോഷ് ഈപ്പനാണ് എന്നാണ് കസ്റ്റംസ് വാദം.

നിലവിൽ നാല് പേരാണ് ഡോളർ കടത്ത് കേസിൽ പ്രതികളായിട്ടുള്ളത്. കേസിൽ അഞ്ചാംപ്രതിയാണ് ഇപ്പോൾ സന്തോഷ് ഈപ്പൻ. ആദ്യം പ്രതിപട്ടികയിൽ ഉണ്ടായിരുന്നത് സരിത്ത്, സ്വപ്ന, സന്ദീപ്, ശിവശങ്കർ എന്നിവരാണ്.