എസ്ഡിപിഐ നേതാവിൻ്റെ വീട്ടിൽ ഇ.ഡി റെയ്ഡ്

പോപ്പുലർ ഫ്രണ്ട് നേതാവ് എം കെ അഷ്റഫിൻ്റെ വീട്ടിൽ എൻഫോഴ്സ്മെൻ്റ് ഡയറക്ടറേറ്റിൻ്റെ റെയ്ഡ്. മൂവാറ്റുപുഴയിലെ വീട്ടിലാണ് ഇ.ഡി പരിശോധന നടത്തുന്നത്. വീടിന് പുറത്ത് പ്രവർത്തകർ പ്രതിഷേധിക്കുകയാണ്. കള്ളപ്പണ ഇടപാടുമായി ബന്ധപ്പെട്ട പരാതിയുടെ അടിസ്ഥാനത്തിലാണ് റെയ്ഡ്. രാവിലെ 9 മണിയോടെയാണ് ഇ.ഡിയുടെ റെയ്ഡ് തുടങ്ങിയത്. എന്തിനാണ് റെയ്ഡ് എന്ന് വ്യക്തമായ മറുപടി ലഭിക്കാതിരുന്നതോടെയാണ് പ്രവർത്തകർ പ്രതിഷേധം തുടങ്ങിയത്.

റെയ്ഡ് നടക്കുമ്പോൾ എം കെ അഷ്റഫ് വീട്ടിൽ ഇല്ല. പിതാവും ഭാര്യയുമാണ് വീട്ടിലുണ്ടായിരുന്നത്. മലപ്പുറം, തിരൂർ, കണ്ണൂർ എന്നിവിടങ്ങളിലും നേതാക്കളുടെ വീടുകളിൽ റെയ്ഡ് നടക്കുന്നുണ്ട്. പെരിങ്ങത്തൂർ സ്വദേശി ഷഫീഖിൻ്റെ വീട്ടിലാണ് മുംബൈയിൽ നിന്നെത്തിയ ഇ.ഡി സംഘം റെയ്ഡ് നടത്തുന്നത്. രാവിലെ എട്ട് മണിക്കാണ് ഇ.ഡി സംഘമെത്തിയത്. ചൊക്ലി പൊലീസും സ്ഥലത്തുണ്ട്. ഇ.ഡി ഗോ ബാക്ക് മുദ്രാവാക്യവുമായി എസ്ഡിപിഐ പ്രവർത്തകർ വീടിനു മുന്നിലെത്തി. ഇവരെ നേരിടാൻ ബിജെപി പ്രവർത്തകർ എത്തിയതോടെ സ്ഥലത്ത് സംഘർഷാവസ്ഥയുണ്ട്. കൂടുതൽ പൊലീസ് സംഘം സ്ഥലത്തെത്തി. ബിജെപിക്ക് സ്വാധീനമുള്ള ഗുരുജി മുക്കിലാണ് ഷഫീഖിൻ്റെ വീട്. എന്തിനാണ് ഇ.ഡിയുടെ മുംബൈ സംഘം റെയ്ഡ് നടത്തുന്നത് എന്ന് വ്യക്തമല്ല.