വാളയാറിൽ സ്ഫോടക വസ്തുക്കൾ പിടികൂടി; രണ്ട് പേർ അറസ്റ്റിൽ

പാലക്കാട്: വാളയാറിൽ സ്ഫോടക വസ്തുക്കൾ പിടികൂടി. രേഖകളില്ലാതെ കടത്താൻ ശ്രമിച്ച ഏഴായിരം ജലാറ്റിൻ സ്റ്റിക്കുകളും 7500 ഡിറ്റണേറ്ററുകളുമാണ് പിടികൂടിയത്. തക്കാളിപ്പെട്ടികൾക്കിടയിൽ വച്ച്‌ കടത്താനായിരുന്നു ശ്രമം. ഈറോഡ് നിന്ന് അങ്കമാലിയിലേക്ക് തക്കാളിയുമായി പോകുന്ന മിനിലോറിയിലായിരുന്നു സ്ഫോടക വസ്തുക്കൾ ഒളിപ്പിച്ചു കടത്താൻ ശ്രമിച്ചത്.

35 പെട്ടികളിലായിട്ടാണ് സ്ഫോടകവസ്തുക്കൾ ഒളിപ്പിച്ച്‌ വച്ചിരുന്നത്. വാഹനത്തിലുണ്ടായിരുന്ന തമിഴ്നാട് സ്വദേശികളായ രവി, പ്രഭു എന്നിവരെ വാളയാർ പൊലീസ് അറസ്റ്റ് ചെയ്തു. പാലക്കാട് ഭാഗത്തെ ക്വാറികളിലുപയോഗിക്കാനായി കൊണ്ട് വന്നതാണോ ഇവയെന്നും പൊലീസ് സംശയിക്കുന്നുണ്ട്.