മദ്യപാനം ചോദ്യം ചെയ്ത പെൺമക്കളെ പിതാവ് തലക്കടിച്ച് കൊന്നു

തമിഴ്‌നാട്ടിൽ മദ്യപാനം ചോദ്യം ചെയ്തതിന് പിതാവ് രണ്ട് പെൺമക്കളെ തല്ക്കടിച്ച് കൊന്നു. കാഞ്ചീപുരം ജില്ലയിലെ മധുരപ്പാക്കത്താണ് ദാരുണമായ സംഭവം. പ്ലസ് വൺ വിദ്യാർത്ഥിനി നന്ദിനി, ഒൻപതാം ക്ലാസ് വിദ്യാർത്ഥിനി ദീപ എന്നിവരാണ് മരിച്ചത്. പിതാവ് ഗോവിന്ദരാജിനെ പൊലീസ് അറസ്റ്റ് ചെയ്തു. ഗോവിന്ദരാജ് മദ്യപിച്ച് ഉപദ്രവിക്കുന്നത് സഹിക്കാൻ കഴിയാതെ ഇവരുടെ മറ്റൊരു മകൾ നദിയ ആത്മഹത്യ ചെയ്തത് ഒരു മാസം മുൻപാണ്. ഇതിന് പിന്നാലെയാണ് ഇയാൾ രണ്ട് മക്കളെ അടിച്ചുകൊന്നത്. ഭാര്യ വീട്ടിലില്ലാത്ത സമയത്തായിരുന്നു ഇയാൾ മദ്യപിച്ച് വീട്ടിലെത്തിയത്. ഇത് ചോദ്യം ചെയ്ത രണ്ടുമക്കളെയും മരത്തടി കൊണ്ട് തലയ്ക്കടിച്ചുവീഴ്ത്തുകയായിരുന്നു. വിവരമറിഞ്ഞ നാട്ടുകാർ കുട്ടികളെ ആശുപത്രിയിലെത്തിച്ചെങ്കിലും രക്ഷിക്കാനായില്ല. മക്കളെ അടിച്ചിട്ട ശേഷം രക്ഷപെടാൻ ശ്രമിച്ച ഗോവിന്ദരാജനെ നാട്ടുകാരാണ് പിടികൂടി പൊലീസിൽ ഏൽപ്പിച്ചത്.