ഇന്ധന വിലയിൽ നികുതിയിളവ് നൽകണം: ഗാന്ധി ദർശൻ വേദി

കൊച്ചി: ഇന്ധന വിലയിൽ നികുതിയിളവ് നൽകാൻ കേന്ദ്ര-സംസ്ഥാന സർക്കാരുകൾ തയ്യാറാകണമെന്ന് കേരള പ്രദേശ് ഗാന്ധി ദർശൻ വേദി സംസ്ഥാന കമ്മിറ്റി ആവശ്യപ്പെട്ടു. കഴിഞ്ഞ രണ്ടാഴ്ചക്കുള്ളിൽ 3 രൂപയോളമാണ് വിലവർദ്ധിപ്പിച്ചത്. ഇത് നിത്യോപയോഗസാധനങ്ങളുടെ വലിയ വിലവർധനവിന് ഇടയാക്കും. കൊവിഡ് ഭീതിയിൽ പൊതു ഗതാഗതം ഉപേക്ഷിച്ച് സ്വകാര്യ വാഹനങ്ങളിലേയ്ക്ക് മാറിയവരുടെ നട്ടെല്ലൊടിക്കുന്നതാണ് ദിനം പ്രതിയുള്ള വിലവർദ്ധനവെന്ന് യോഗം ചൂണ്ടിക്കാട്ടി.

സംസ്ഥാനത്തിന് ലഭിക്കുന്ന ഭീമമായ നികുതി വരുമാനത്തെ കെട്ടിപ്പിടിക്കാതെ കഴിഞ്ഞ യുഡിഎഫ് സർക്കാരിന്റെ കാലത്ത് ചെയ്തതുപോലെ അധിക വരുമാനം വേണ്ടെന്ന് വച്ച് ജനങ്ങളുടെ ദുരിതം കുറയ്ക്കാൻ സർക്കാരുകൾ തയ്യാറാകണമെന്ന് യോഗം ആവശ്യപ്പെട്ടു. സംസ്ഥാന ചെയർമാൻ ഡോ. എം സി ദിലീപ് കുമാർ അധ്യക്ഷത വഹിച്ചു. ഡോ. നെടുമ്പന അനിൽ, ഡോ. അജിതൻ മേനോത്ത്, ശങ്കർ കുമ്പളത്ത്, ടി ജെ പീറ്റർ , ഡോ: പി വി പുഷ്പജ, അഡ്വ. ജി. മനോജ് കുമാർ , മാമ്പുഴക്കരി വി എസ് ദിലീപ് കുമാർ എന്നിവർ പ്രസംഗിച്ചു.