റെക്കോർഡുകൾ തകർത്ത് സ്വർണവില പുതിയ ഉയരങ്ങളിലേക്ക്; പവന് ഇന്ന് 32800 രൂപ

റെക്കോർഡുകൾ തകർത്ത് സ്വർണവില വീണ്ടും ഉയർന്നു. ഇന്ന് പവന് 800 രൂപ ഉയർന്നതോടെ വില 32800 രൂപയായി. ഗ്രാമിന് 100 രൂപയാണ് ഉയർന്നത്. ഇതോടെ വില 4100 ആയി. 32320 രൂപയായിരുന്നു കേരളത്തിലെ റെക്കോർഡ് വില. കോവിഡ്19 പശ്ചാത്തലത്തിൽ ആഗോള ഓഹരി വിപണികളിലുണ്ടാകുന്ന അനിശ്ചിതത്വം നിക്ഷേപകരെ സ്വർണം വാങ്ങാൻ പ്രേരിപ്പിക്കുന്നതാണു വിലക്കയറ്റത്തിന്റെ കാരണം.

നിക്ഷേപകർ സ്വർണത്തിലേക്കു ചുവടുമാറ്റിയതോടെ ഡിമാൻഡ് ഉയരുകയാണ്. ഓഹരി വിപണികളിലെ തകർച്ചകൾക്കിടയിലും സുരക്ഷിത നിക്ഷേപമെന്ന ചിന്തയാണ് ആഗോള നിക്ഷേപകരെ സ്വർണത്തിലേക്ക് അടുപ്പിക്കുന്നത്. രാജ്യാന്തര വിപണിയിൽ ട്രോയ് ഔൺസിന് (31.1 ഗ്രാം സ്വർണം) വില 1660 ഡോളറായി ഉയർന്നിട്ടുണ്ട്. ഇന്നു മാത്രം 25 ഡോളർ ഉയർന്നു. ഡോളറിനെതിരെ രൂപയുടെ മൂല്യം ഇടിയുന്നതും സ്വർണവിലയെ ബാധിക്കുന്നുണ്ട്. 76 നിലവാരത്തിലാണ് ഇപ്പോൾ രൂപ.