തിരുവനന്തപുരം: സ്വപ്നയും സരിത്തുമായി സുഹൃത്ത് ബന്ധം മാത്രമാണ് ഉള്ളതെന്ന് എം ശിവശങ്കര്‍. സ്വര്‍ണക്കടത്ത് കേസില്‍ കസ്റ്റംസിന് നല്‍കിയ മൊഴി തന്നെയാണ് എന്‍ഐഎ സംഘത്തിന് മുന്നിലും എം ശിവശങ്കര്‍ ആവര്‍ത്തിച്ചത്. കഴിഞ്ഞ ദിവസം എന്‍ഐഎ നടത്തിയ അഞ്ച് മണിക്കൂറോളം നീണ്ട ചോദ്യം ചെയ്യലിന് ഒടുവിലാണ് ശിവശങ്കര്‍ ഇക്കാര്യം വ്യക്തമാക്കിയത്.
സ്വര്‍ണക്കടത്ത് കേസില്‍ തനിക്ക് പങ്കില്ലെന്നും കേസിലെ മറ്റ് പ്രതികളെ അറിയില്ലെന്നാണ് ശിവശങ്കറിന്റെ മൊഴി. തനിക്കെതിരെ നല്‍കിയ സരിത്തിന്റെ മൊഴി ശിവശങ്കര്‍ നിഷേധിക്കുകയും ചെയ്തു. സ്വര്‍ണക്കടത്തുമായി ബന്ധപ്പെട്ട വിവരങ്ങള്‍ ശിവശങ്കര്‍ അറിഞ്ഞിരുന്നെന്ന സരിത്തിന്റെ മൊഴിയാണ് നിഷേധിച്ചത്. നേരത്തെ കസ്റ്റംസിന് നല്‍കിയ മൊഴി പരിശോധിച്ചാണ് എന്‍ഐഎ സംഘം ശിവശങ്കറിനെ ചോദ്യം ചെയ്തത്. അതേസമയം, ശിവശങ്കര്‍ എന്‍ഐഎ കൊച്ചി ഓഫിസില്‍ വീണ്ടും ഹാജരാകണമെന്ന് നിര്‍ദേശം. തിങ്കളാഴ്ച ഹാജരാകാനാണ് നിര്‍ദേശം. കൊച്ചിയിലെത്താന്‍ നോട്ടീസ് നല്‍കിയാണ് ഇന്നലെ വിട്ടയച്ചത്.
© 2019 IBC Live. Developed By Web Designer London
