സർക്കാർ ഉത്തരവിൽ വ്യക്തതയില്ല; സമരം തുടരുമെന്ന് ഡോക്ടർമാർ

പ്രതിഷേധ സമരം തുടരുമെന്ന് പിജി ഡോക്ടർമാർ. പ്രശ്‌നപരിഹാരത്തിന് ആരോഗ്യമന്ത്രി വീണാ ജോർജ് ചർച്ചയ്ക്ക് തയ്യാറാകണമെന്ന് സമരം തുടരുന്ന ഡോക്ടർമാർ അറിയിച്ചു. ചർച്ചയ്ക്ക് തയ്യാറല്ലെങ്കിൽ അടിയന്തര സേവനം നിർത്തുമെന്ന് ഡോക്ടർമാർ മുന്നറിയിപ്പ് നൽകി. ജൂനിയർ റസിഡന്റുമാരുടെ നിയമനത്തിൽ വ്യക്തത വരുത്തണമെന്നും പിജി ഡോക്ടർമാർ ആവശ്യപ്പെട്ടു.

നേരത്തെ നോൺ അക്കാദമിക് ജൂനിയർ റസിഡൻറുമാരെ നിയമിക്കുന്നതിനുള്ള സർക്കാർ ഉത്തരവ് പുറത്തിറങ്ങിയിരുന്നു. സമരത്തിലുള്ള പിജി ഡോക്ടർമാരുടെ പ്രധാന ആവശ്യങ്ങളിലൊന്നായിരുന്നു ഇത്. കോട്ടയം 75, കോഴിക്കോട്, തൃശൂർ 72, ആലപ്പുഴ 61, തിരുവനന്തപുരം 50, എറണാകുളം 7 എന്നിങ്ങനെയാണ് മെഡിക്കൽ കോളജുകളിൽ ജൂനിയർ റസിഡൻറുമാരെ നിയമിക്കുക. ഡോക്ടർമാരുടെ കുറവ് നികത്തണമെന്നത് ഉൾപ്പടെയുള്ള ആവശ്യങ്ങളുന്നയിച്ചാണ് പിജി ഡോക്ടർമാർ സമരം നടത്തുന്നത്.

സമരക്കാരുമായി നേരത്തെ നടത്തിയ ച‍ർച്ചയിൽ നിയമനം ഉടനുണ്ടാകുമെന്ന് സർക്കാർ ഉറപ്പുനൽകിയിരുന്നു. അത്യാഹിത വിഭാഗം ഉൾപ്പെടെ ബഹിഷ്കരിക്കാൻ പിജി ഡോക്ടർമാർ തീരുമാനിച്ച സാഹചര്യത്തിൽ കൂടിയാണ് സർക്കാർ നടപടി.