മത്സ്യസമ്പത്ത് കൊള്ളയടിക്കാൻ ശ്രമിക്കുന്നുവെന്ന ചെന്നിത്തലയുടെ ആരോപണത്തെ തള്ളി ജെ മേഴ്‌സിക്കുട്ടിയമ്മ

കേരളത്തിലെ മത്സ്യസമ്പത്ത് കൊള്ളയടിക്കാൻ അന്തർദേശീയ ശക്തികളുടെ ശ്രമമെന്ന പ്രതിപക്ഷ നേതാവ് രമേശ് ചെന്നിത്തലയുടെ ആരോപണം തള്ളി മന്ത്രി ജെ മേഴ്‌സിക്കുട്ടിയമ്മ. ആരോപണങ്ങൾ അസംബന്ധമാണ്. മത്സ്യബന്ധനത്തിന് അനുമതി നൽകേണ്ടത് ഫിഷറീസ് വകുപ്പാണെന്നും അത്തരത്തിലൊരു ആവശ്യം തന്റെ മുൻപിൽ വന്നിട്ടില്ലെന്നും മന്ത്രി ജെ മേഴ്‌സിക്കുട്ടിയമ്മ വ്യക്തമാക്കി.

മത്സ്യബന്ധനത്തിന് അനുമതി നൽകിയിരിക്കുന്നത് പരമ്പരാഗത മത്സ്യത്തൊഴിലാളികൾക്ക് മാത്രമാണ്. ഫിഷറീസ് നയത്തിൽ ഇക്കാര്യങ്ങൾ വ്യക്തമായി പറഞ്ഞിട്ടുണ്ട്. അതിന് വിധേയമായി മാത്രമേ കാര്യങ്ങൾ നടക്കൂ. പരമ്പരാഗത മത്സ്യത്തൊഴിലാളികൾക്ക് മാത്രമാണ് ആഴക്കടൽ മത്സ്യബന്ധനത്തിന് അനുമതിയുള്ളൂ. അതിനെ ദുർവ്യാഖ്യാനം ചെയ്യുകയാണ് പ്രതിപക്ഷ നേതാവ്. പ്രതിപക്ഷ നേതാവിനെ എന്തെങ്കിലും ബോംബ് പൊട്ടിച്ച് നടക്കണമെന്ന അത്യാർത്തിമൂലം പറയുന്നതാണ്. അതൊക്കെ അദ്ദേഹത്തിന്റെ ദിവാസ്വപ്‌നമാണെന്നും മന്ത്രി ജെ. മേഴ്‌സിക്കുട്ടിയമ്മ പറഞ്ഞു.

കേരളത്തിലെ മത്സ്യസമ്പത്ത് കൊള്ളയടിക്കാൻ അന്തർദേശീയ ശക്തികളുടെ ശ്രമം നടക്കുന്നുവെന്നായിരുന്നു പ്രതിപക്ഷ നേതാവിന്റെ ആരോപണം. മത്സ്യമേഖലയെ അമേരിക്കൻ കമ്പനിക്ക് തീറെഴുതാൻ സർക്കാർ നീക്കമെന്നും ചെന്നിത്തല ആരോപിച്ചു. ആഴക്കടൽ മത്സ്യബന്ധനത്തിന് ഇഎംസിസി എന്ന അമേരിക്കൻ കമ്പനിയുമായി കരാർ ഒപ്പിച്ചുവെന്നും ചെന്നിത്തല പറഞ്ഞു.