10 സീറ്റ് മതിയെന്ന നിലപാടിൽ ജോസഫ്

യുഡിഎഫിൽ സീറ്റ് വിഭജനം നീളുന്നു. മുസ്‍ലിം ലീഗുമായും ജോസഫ് ഗ്രൂപ്പുമായും കോൺഗ്രസ് നടത്തിയ ചർച്ചയിൽ ധാരണയായില്ല. പ്രശ്നപരിഹാരത്തിന് പുതിയ ഫോർമുലയുമായി ജോസഫ് ഗ്രൂപ്പ് രംഗത്ത് വന്നിട്ടുണ്ട്. അധികമായി നൽകുന്ന സീറ്റുകളുടെ കാര്യത്തിലാണ് കോൺഗ്രസും ലീഗും തമ്മിൽ തർക്കം.15 സീറ്റ് ചോദിച്ച് തുടങ്ങിയ ജോസഫ് 10 സീറ്റ് മതിയെന്ന നിലപാടിൽ എത്തിയിട്ടുണ്ട്. തർക്കത്തിലുള്ള കാഞ്ഞിരപ്പള്ളി, പൂഞ്ഞാർ, പേരാമ്പ്ര സീറ്റുകൾ കോൺഗ്രസ് ഏറ്റെടുത്ത് മൂവാറ്റുപുഴ സീറ്റ് നൽകി പ്രശ്ന പരിഹാരമുണ്ടാക്കണമെന്നാണ് നിലവിലെ ആവശ്യം. ഈ നിർദ്ദേശം കോൺഗ്രസ് ചർച്ച ചെയ്യും.

ലീഗിൻ്റെ സീറ്റിന്റെ എണ്ണത്തിൽ തർക്കമില്ല. പക്ഷേ ഏതൊക്കെയാണ് എന്നതിൽ തർക്കമുണ്ട്. ലീഗ് 27 സീറ്റുകളിൽ മത്സരിക്കും. പട്ടാമ്പിയും, പേരാമ്പ്രയും, കൂത്തുപറമ്പും അധികമായി ചോദിച്ചു. കൂത്തുപറമ്പ് നൽകാൻ കോൺഗ്രസിനും സമ്മതമാണ്. പക്ഷേ മറ്റ് രണ്ട് സീറ്റുകളായി ചേലക്കരയും ഇരവിപുരവും നല്കാനേ കഴിയുവെന്ന് വ്യക്തമാക്കി. ചോദിച്ച സീറ്റുകൾ തന്നെ കിട്ടണമെന്ന നിലപാടിൽ ലീഗ് നിൽക്കുകയാണ്.