കമറുദ്ദീൻ എംഎൽഎക്ക് ജാമ്യം അനുവദിച്ചു; പക്ഷെ പുറത്തിറങ്ങാനാവില്ല

ഫാഷൻ ഗോൾഡ് തട്ടിപ്പ് കേസിൽ എം സി കമറുദ്ദീൻ എംഎൽഎക്ക് ജാമ്യം. തട്ടിപ്പ് കേസിൽ രജിസ്ട്രർ ചെയ്ത മൂന്ന് കേസിലാണ് ഹൈക്കോടതി എംഎൽഎക്ക് ജാമ്യം അനുവദിച്ചത്. എന്നാൽ മറ്റ് കേസുകൾ ഉള്ളതിനാൽ കമറുദ്ദീന് പുറത്തിറങ്ങാനാവില്ല. നിയമസഭാ സമ്മേളനത്തിൽ പങ്കെടുക്കാൻ ജാമ്യം അനുവദിക്കണമെന്നായിരുന്നു കമറുദ്ദീൻറെ ആവശ്യം. എന്നാൽ 84 കേസുകളാണ് ഫാഷൻ ഗോൾഡ് തട്ടിപ്പ് കേസിൽ രജിസ്റ്റർ ചെയ്തിട്ടുള്ളത്. അതിനാൽ ജാമ്യം അനുവദിക്കരുതെന്നായിരുന്നു സർക്കാരിൻ്റെ വാദം.

നവംബർ 7 മുതൽ ജയിലിലാണ് കമറുദ്ദീൻ. തെളിവെടുപ്പ് ഉൾപ്പെടെ പൂർത്തിയായതിനാൽ കോടതി ജാമ്യം അനുവദിക്കുകയായിരുന്നു. ഉപാധികളോടെയാണ് ജാമ്യം. കേസ് നടക്കുന്ന സ്റ്റേഷൻ പരിധിയിൽ മൂന്ന് മാസത്തേക്ക് പ്രവേശിക്കാൻ പാടില്ല. എന്നാൽ ഇനിയും കേസുകൾ ഉള്ളതിനാൽ ഇപ്പോൾ പുറത്തിറങ്ങാനാകില്ല.