മലപ്പുറം: 18 പേരുടെ ദാരുണ മരണത്തിനിടയാക്കിയ വിമാനാപകടം മറയാക്കി കരിപ്പൂര്‍ വിമാനത്താവളത്തനെതിരെ വീണ്ടും ലോബികള്‍ പ്രവര്‍ത്തനം സജീവമാക്കുന്നു. മുംബൈ കേന്ദ്രമായ ലോബികളാണ് ഇതിന് പ്രധാനമായും പിന്നില്‍ പ്രവര്‍ത്തിക്കുന്നത്. അന്താരാഷ്ട്രാ നിലവാരം എടുത്തുകളയാനുള്ള നീക്കമാവും തുടക്കത്തിലുണ്ടാവുക. ശേഷം വിമാനങ്ങളുടെ സര്‍വീസുകള്‍ക്ക് വിലക്കേര്‍പെടുത്തല്‍ അടക്കമുള്ള കാര്യങ്ങളാവും ചെയ്യുക. ഇതിന് വീണ് കിട്ടിയ അപകടത്തെ മുന്‍ നിര്‍ത്തിയാവും തന്ത്രങ്ങള്‍ മെനയുക. ആഭ്യന്തര സര്‍വീസുകള്‍ മാത്രമായോ കോര്‍ഗോ സേവനത്തിന് മാത്രമായോ ഉപയോഗപ്പെടുത്താനാവും നീക്കം.
അപകടത്തിന്റെ ദുഃഖത്തില്‍ പങ്കു ചേരുന്നതിന് പകരം വിമാനത്താവളത്തിന്റെ അസൗകര്യങ്ങളെക്കുറിച്ചുള്ള ഇല്ലാ കഥകള്‍ പ്രചരിപ്പിക്കാനാണ് നീക്കങ്ങള്‍ ഇവര്‍ ഇപ്പോഴേ ആരംഭിച്ചത്. വര്‍ഷങ്ങള്‍ക്ക് മുമ്പെല്ലാം മലയാളികള്‍ മുംബൈ വിമാനത്താവളത്തെ കേന്ദ്രീകരിച്ചായിരുന്നു വിദേശ യാത്രകള്‍ നടത്തിയിരുന്നത്. അന്ന് മുതല്‍ പതിയെ തുടങ്ങിയ പാരവെപ്പ് ഇപ്പോള്‍ പ്രത്യക്ഷത്തില്‍ തന്നെ രംഗത്ത് വരുന്നുണ്ട്. നേരത്തെ കണ്ണൂരിലേക്ക് തിരിച്ചു വിടാനുള്ള നീക്കങ്ങള്‍ നടത്തിയിരുന്നു. ഇത് തല്‍ക്കാലം നിര്‍ത്തിവെച്ചിട്ടുണ്ടെങ്കിലും അപകടത്തിന്റെ അലയൊലികള്‍ കഴിയുന്നതോടെ വീണ്ടും സജീവമാകാനുള്ള സാധ്യതയും നിലനില്‍ക്കുന്നുണ്ട്. നവീകരണത്തിന്റെ പേരില്‍ മാസങ്ങള്‍ അടച്ചിട്ട കരിപ്പൂര്‍ വിമാനത്താവളത്തില്‍ റണ്‍വേയില്‍ കാര്യമായ അറ്റകുറ്റപ്പണികളൊന്നും ചെയ്തിട്ടില്ലെന്നാണ് യാത്രക്കാര്‍ പറയുന്നത്.
വിമാനം നിലത്തിറങ്ങുമ്പോള്‍ തന്നെ ഇത് അറിയാനാവുമെന്നാണ് ഇവരുടെ പക്ഷം. കല്ലുകള്‍ നിറഞ്ഞ റോഡിലൂടെ പോവുന്ന രീതിയിലുള്ള ഒരു ലാന്റിങ്ങാണ് കരിപ്പൂരില്‍ അനുഭവപ്പെടുന്നതത്രെ. അറ്റകുറ്റപ്പണികള്‍ കാര്യമായി ചെയ്യാതിരിക്കുന്നത് കരിപ്പൂരിനെ മനപ്പൂര്‍വ്വം ഭൂപടത്തില്‍ നിന്നും ഇല്ലാതെയാക്കുന്നതിനുള്ള ശ്രമമായും വിലയിരുത്തപ്പെടുന്നുണ്ട്. മാത്രമല്ല ഇന്ത്യയിലെ വിമാനങ്ങളുടെ കാലപ്പഴക്കവും അപകടത്തിന് കാരണമാണെന്നത് പരസ്യമാണ്. 25 വര്‍ഷത്തിലേറെ പഴക്കമുള്ള എയര്‍ ഇന്ത്യ പോലുള്ള കമ്പനികള്‍ ഇപ്പോഴും സര്‍വീസ് നടത്തുന്നത് പോലും മറച്ചു വെച്ച് കരിപ്പൂര്‍ വിമാനത്താവളത്തെ മാത്രം കുറ്റപ്പെടുത്തി തങ്ങളുടെ ലക്ഷ്യം നേടാനാണ് നീക്കം നടത്തുന്നത്. സത്യത്തില്‍ തനിക്കാക്കി വെടക്കാക്കുക എന്ന തന്ത്രമാണ് കരിപ്പൂരിനെതിരെ പ്രവര്‍ത്തിക്കുന്ന ലോബികള്‍ ശ്രമിക്കുന്നത്.
© 2019 IBC Live. Developed By Web Designer London
