ഇടത് സർക്കാരിനെ കടലിൻ്റെ മക്കൾ കടലിൽ എറിയുമെന്ന് ഉമ്മൻ ചാണ്ടി

ഇടത് സർക്കാരിനെ കടലിൻ്റെ മക്കൾ കടലിൽ എറിയുമെന്ന് ഉമ്മൻ ചാണ്ടി. ആഴക്കടൽ മത്സ്യബന്ധന കരാറിലൂടെ മത്സ്യ തൊഴിലാളികളോടുള്ള ക്രൂര സമീപനമാണ് പുറത്തുവന്നത്. മത്സ്യ തൊഴിലാളികളെ വഴിയാധാരമാക്കുന്ന സർക്കാരിൻ്റെ ജനദ്രോഹ നയം പ്രതിപക്ഷ നേതാവ് കണ്ടുപിടിച്ചത് കേരളത്തെ അപമാനിക്കാനല്ല. തെറ്റ് കണ്ടുപിടിച്ചത് കുറ്റമായാണ് മുഖ്യമന്ത്രിയുടെ ആരോപണമെന്നും ആഴക്കടൽ മത്സ്യബന്ധനത്തിന് അനുമതി കൊടുത്ത കരാറാണ് കേരളത്തിന് അപമാനമെന്നും ഉമ്മൻ ചാണ്ടി പറഞ്ഞു. കരാർ പിൻവലിച്ചത് ഔദാര്യമല്ലെന്നും പിടിച്ച് നിൽക്കാനുള്ള സർക്കാരിൻ്റെ പരിശ്രമമാണെന്നും ഉമ്മൻ ചാണ്ടി കൂട്ടിച്ചേർത്തു.

മത്സ്യ തൊഴിലാളികൾക്ക് അഞ്ച് ശതമാനം നികുതി ഏർപ്പെടുത്തിയ സർക്കാരാണ് പിണറായിയുടേത്. ഈ സർക്കാരിൽ നിന്ന് ഇതിൽ കൂടുതൽ പ്രതീക്ഷിക്കാനില്ല. യുഡിഎഫ് സർക്കാർ ബിപിഎൽ വിഭാഗത്തിന് സൗജന്യ അരി നൽകിയപ്പോൾ ഇടത് സർക്കാർ ആ അരിക്ക് 2 രൂപ കൈകാര്യ ചാർജ് ഏർപ്പെടുത്തിയതായും ഉമ്മൻ ചാണ്ടി കൂട്ടിച്ചേർത്തു.