സംസ്ഥാന സര്‍ക്കാര്‍ കോവിഡിനെ നേരിടുന്നതില്‍ കുറച്ചുകൂടി കാര്യക്ഷമത കാണിക്കണമെന്ന് പി.കെ.കുഞ്ഞാലിക്കുട്ടി എം.പി. കൈവിട്ട പോലെയാണ് സര്‍ക്കാരിന്റെ ഇപ്പോഴത്തെ പെരുമാറ്റമെന്നും വിദേശത്തും മറ്റും കുടുങ്ങിയവര്‍ അവിടെ കിടക്കട്ടെ എന്ന നിലപാടാണ് സര്‍ക്കാരിനെന്നും അദ്ദേഹം ആരോപിച്ചു. സംസ്ഥാനത്തെ നിലവിലെ ക്വാറന്റീന്‍ സൗകര്യങ്ങളും കുറ്റമറ്റതല്ലെന്നും കുഞ്ഞാലിക്കുട്ടി പറഞ്ഞു.
വിദേശത്ത് ഉള്ളവരുടെ കാര്യത്തില്‍ കേരള സര്‍ക്കാര്‍ കുറച്ചുകൂടി താത്പര്യം കാണിക്കണം. പ്രവാസികളെ മുഴുവനായി കൊണ്ടുവരാന്‍ അല്ല പ്രതിപക്ഷം പറയുന്നത്. ഗ്രാമങ്ങളില്‍ ക്വാറന്റീന്‍ ഒരുക്കാനുള്ള സൗകര്യമുണ്ട്. ഇതിനായി പഞ്ചായത്തുകള്‍ക്കും മുനിസിപ്പാലിറ്റികള്‍ക്കും മറ്റും ആവശ്യമായ ഫണ്ട് സര്‍ക്കാര്‍ കൈാടുക്കണം. സൗകര്യങ്ങളൊരുക്കുന്നതില്‍ തദ്ദേശസ്ഥാപനങ്ങളേയും എംഎല്‍എമാരടക്കമുള്ള ജനപ്രതിനിധികളേയും പങ്കാളികളാക്കണം.
സംസ്ഥാനത്ത് സാമൂഹ്യ വ്യാപനം ഉണ്ടോ ഇല്ലയോ എന്നതില്‍ ഒരു ഉറപ്പും സര്‍ക്കാരിനില്ല. ഉറവിടം അറിയാത്ത കേസുകള്‍ വര്‍ധിച്ചുകൊണ്ടിരിക്കുന്നു. പ്രതിപക്ഷത്തോടു കൂടി ആലോചിച്ച് ഈ വിഷയങ്ങള്‍ സര്‍ക്കാര്‍ കുറേക്കൂടി ജാഗ്രതയോടെ കൊണ്ടുപോകണം. കൃത്യമായ മുന്നൊരുക്കമില്ലാതെ രാജ്യത്ത് ലോക് ഡൗണ്‍ പ്രഖ്യാപിച്ചതാണ് രാജ്യത്ത് കോവിഡ് കേസുകള്‍ വര്‍ധിക്കാന്‍ കാരണമെന്നും കുഞ്ഞാലിക്കുട്ടി ആരോപിച്ചു.
© 2019 IBC Live. Developed By Web Designer London
