യാത്രക്കാരുടെ സുരക്ഷ ഉറപ്പാക്കേണ്ടത് ജീവനക്കാരുടെ ചുമതലയെന്ന് മന്ത്രി ആൻ്റണി രാജു

കോഴിക്കോട് കെ എസ് ആർ ടി സി ബസിൽ അധ്യാപികയോട് സഹയാത്രികൻ മോശമായി പെരുമാറിയ സംഭവത്തിൽ ഇടപെടാത്ത ജീവനക്കാർക്കെതിരെ കർശന നടപടിയെടുക്കുമെന്ന് ഗതാഗത മന്ത്രി ആൻ്റണി രാജു പറഞ്ഞു. ആക്രമിക്കപ്പെട്ട യുവതിയുമായി മന്ത്രി ഫോണിൽ സംസാരിക്കുകയും വിവരങ്ങൾ ശേഖരിക്കുകയും ചെയ്തു. യാത്രക്കാരുടെ സുരക്ഷ ഉറപ്പാക്കേണ്ടത് ജീവനക്കാരുടെ ചുമതലയാണ്. ജീവനക്കാർക്ക് വീഴ്ചയുണ്ടായത് അംഗീകരിക്കുന്നു. എം ഡിയോട് അടിയന്തരമായി റിപ്പോർട്ട് ആവശ്യപ്പെട്ടിട്ടുണ്ടെന്നും മന്ത്രി അറിയിച്ചു. ഇത്തരം സംഭവങ്ങൾ കെ എസ് ആർ ടി സിയിൽ ആവർത്തിക്കാൻ അനുവദിക്കില്ലെന്നും അദ്ദേഹം പറഞ്ഞു.

കോഴിക്കോട്ടേക്കുള്ള യാത്രക്കിടെ ശനിയഴ്ചയാണ് യുവതിക്ക് നേരെ സഹയാത്രികൻ മോശമായി പെരുമാറിയത്. സംഭവത്തെക്കുറിച്ച്‌ കണ്ടക്ടറോടും സഹയാത്രികരോടും പരാതിപ്പെട്ടെങ്കിലും ആരും ഇടപെട്ടില്ലെന്ന് യുവതി പറഞ്ഞു. കോഴിക്കോട് സ്വദേശിനിക്കാണ് കെഎസ്ആർടിസി യിൽ ദുരനുഭവമുണ്ടായത്. കണ്ടക്ടറുടെയും സഹയാത്രികരുടെയും മൗനം, ബസിൽ നേരിട്ട അതിക്രമത്തെക്കാൾ മുറിവേൽപ്പിച്ചതായും നിയമനടപടിയുമായി മുന്നോട്ട് പോകുമെന്നും യുവതി മാധ്യമങ്ങളോട് പറഞ്ഞിരുന്നു. ജീവനക്കാർക്കെതിരെ യുവതി കെ എസ്ആർടിസി അധികൃതർക്ക് പരാതി നൽകിയിട്ടുണ്ട്.