ലോകമെമ്പാടുമുള്ള സംഗീത പ്രേമികളുടെ പ്രിയപ്പെട്ട സ്ട്രീമിങ് പ്ലാറ്റ്‌ഫോമുകളായ ആമസോണ്‍ പ്രൈം മ്യൂസിക്കിലും ആപ്പിള്‍ മ്യൂസിക്കിലും സിനിമാ സംഗീത സംവിധായകന്‍ സാനന്ദ് ജോര്‍ജ്ജ് ഗ്രേസിൻ്റെ പാട്ടുകളും ഇനി മുതല്‍ തെരയാം. ലോക പ്രശസ്ത സംഗീത സംവിധാകര്‍ക്കൊപ്പം സാനന്ദിൻ്റെ പേരും സെര്‍ച്ച് ലിസ്റ്റിലെത്തിയത് മലയാള സംഗീതാസ്വാദകര്‍ക്ക് അഭിമാന മുഹൂര്‍ത്തമായി. സിനിമയ്ക്കു പുറത്തുള്ള എക്‌സ്‌ക്ലൂസ്സീവ് ഗാനങ്ങളാണ് ആദ്യഘട്ടത്തില്‍ ഈ പ്ലാറ്റ്‌ഫോമുകളില്‍ സാനന്ദ് ജോര്‍ജ്ജ് ഗ്രേസ് എത്തിയ്ക്കുന്നത്. ആമസോണ്‍ പ്രൈം മ്യൂസിക്കിലും ആപ്പിള്‍ മ്യൂസിക്കിലും സാനന്ദ് ജോര്‍ജ്ജ് ഗ്രേയ്സ് ഈണം നല്‍കിയ ‘ സ്‌നേഹം നിലാവായ നേരം ‘ എന്ന ഗാനം ഇപ്പോള്‍ ലഭ്യമാണ്. ആവശ്യക്കാര്‍ക്ക് ഓഡിയോ ഡൗണ്‍ലോഡും ചെയ്യാം. മലയാള സിനിമയ്ക്ക് നിരവധി സൂപ്പര്‍ഹിറ്റ് വരികള്‍ സമ്മാനിച്ച ബി കെ ഹരിനാരായണനാണ് ഈ ക്രൈസ്തവ ഗാനം രചിച്ചത്.
നിരവധി സൂപ്പര്‍ഹിറ്റ് സിനിമകളിലൂടെ ശ്രദ്ധേയനായ കണ്ണന്‍ താമരക്കുളം സംവിധാനം ചെയ്യുന്ന ഡാര്‍ക്ക് ത്രില്ലര്‍ മൂവിയായ ഉടുമ്പ് സിനിമയുടെ പാട്ടുകളുടെ പണിപ്പുരയിലാണ് സാനന്ദ് ഇപ്പോള്‍. സെന്തില്‍ രാജാമണി കേന്ദ്ര കഥാപാത്രത്തെ അവതരിപ്പിയ്ക്കുന്ന ഉടുമ്പിന് ജനപ്രിയ താരങ്ങളുടെ കട്ട സപ്പോര്‍ട്ടുണ്ട്. ഉടുമ്പിൻ്റെ ടൈറ്റില്‍ ജയസൂര്യയും ഫസ്റ്റ് ലുക്ക് പോസ്റ്റര്‍ ദുല്‍ഖര്‍ സല്‍മാനും പുറത്തിറക്കി. ചിത്രത്തിൻ്റെ ആദ്യ ടീസര്‍ പൃഥ്വിരാജും ഉണ്ണിമുകുന്ദനും ചേര്‍ന്നാണ് റിലീസ് ചെയ്തത് . തിയേറ്ററുകള്‍ തുറക്കും മുമ്പ് തന്നെ ഉടുമ്പ് സിനിമയുടെ വിശേഷങ്ങള്‍ സോഷ്യല്‍ മീഡിയയില്‍ ട്രെന്‍ഡിങ്ങായി. ആക്ഷനൊപ്പം സംഗീതത്തിനും പ്രാധാന്യമുള്ള ഉടുമ്പ് സിനിമയിലെ എല്ലാ ഗാനങ്ങള്‍ക്കും ഈണം നല്‍കുന്നതിനൊപ്പം പശ്ചാത്തല സംഗീതവും സാനന്ദ് ജോര്‍ജജ് ഗ്രേയ്സ് ആണ് നിര്‍വഹിയ്ക്കുന്നത്. കണ്ണന്‍ താമരക്കുളത്തിൻ്റെ ജയറാം ചിത്രമായ പട്ടാഭിരാമനിലും അനൂപ് മേനോന്‍ പ്രധാന വേഷത്തിലെത്തുന്ന മരട് 357ലും, പശ്ചാത്തല സംഗീതവും പശ്ചാത്തല ഗാനങ്ങളും ഒരുക്കിയത് സാനന്ദ് ജോര്‍ജ്ജ് ഗ്രേസ് ആണ്. കണ്ണന്‍ താമരക്കുളത്തിന്റെ പുതിയ ചിത്രമായ ഉടുമ്പിൻ്റെ ടീസറിലെ ദൃശ്യങ്ങളും സംഗീതവും പ്രേക്ഷകരെ ഞെട്ടിച്ചു. ഉടുമ്പിൻ്റെ തിയേറ്റര്‍ റിലീസിനായി പുതുതലമുറ പ്രേക്ഷകര്‍ ആവേശത്തോടെ കാത്തിരിയ്ക്കുകയാണ് .
സിനിമകള്‍ക്കൊപ്പം പ്രമുഖ സ്ട്രീമിങ് പ്ലാറ്റ് ഫോമുകള്‍ക്കുവേണ്ടിയും സംഗീതമൊരുക്കുന്നതിനുള്ള ചുവടു വയ്പിൻ്റെ ഭാഗമായാണ് സാനന്ദ് ജോര്‍ജ്ജ് ഗ്രേയ്സ് – ബി.കെ ഹരിനാരായണന്‍ ടീം സ്‌നേഹം നിലാവായ വീഡിയോ ഗാനം പുറത്തിറക്കിയത്. പുതുമയാര്‍ന്ന സംഗീതത്തിലൂടെയും ഇമ്പമാര്‍ന്ന വരികളിലൂടെയും ഹൃദ്യമായ ഈ ഗാനം മ്യൂസിക് ബ്രയോയാണ് നിര്‍മ്മിച്ചത്. പ്രശസ്തര്‍ക്കൊപ്പം നവാഗതരായ ഗായകര്‍ക്കും എഴുത്തുകാര്‍ക്കും സംഗീത ലോകത്തേയ്ക്ക് ഹരിശ്രീ കുറിക്കുന്നതിനുള്ള സംഗീത വീഡിയോകളും മ്യൂസിക് ബ്രയോ പുറത്തിറക്കുമെന്ന് അണിയറ പ്രവര്‍ത്തകര്‍ പറഞ്ഞു.
ആമസോണ്‍ പ്രൈം മ്യൂസിക്കിലും ആപ്പിള്‍ മ്യൂസിക്കിലും ഇടം നേടിയ സ്‌നേഹം നിലാവായ നേരത്തിന് കീബോര്‍ഡും പ്രോഗ്രാമിങ്ങും നിര്‍വഹിച്ചത് സാനന്ദിന്റെ സഹോദരന്‍ സഞ്ജിത്ത് ജോര്‍ജ്ജ് ഗ്രേയ്സ് ആണ് . വീഡിയോ ഗാനത്തിന് വിഷ്ണൂബുദ്ധന്‍ ദൃശ്യാവിഷ്‌ക്കാരവും ഷിജിത് പി നായര്‍ എഡിറ്റിങ്ങും നിര്‍വഹിച്ചു. റെക്കോര്‍ഡിങ് – റോമി, മിക്‌സ് ആന്റ് മാസ്റ്ററിങ് – സാന്‍ജിയോ, സ്റ്റുഡിയോ ഭൈരവി എൻ്റര്‍ടൈയ്ന്‍മെൻ്റ്സ്, പിആര്‍ഒ എ.എസ് പ്രകാശ് എന്നിവരാണ് മറ്റ് അണിയറ പ്രവര്‍ത്തകര്‍.
അവിശ്വസനീയ ഓഫറുകളുമായി ഗോദ്രെജ് ഇൻ്റീരിയോ
© 2019 IBC Live. Developed By Web Designer London
