നിർത്തിയിട്ടിരുന്ന സ്‌കൂൾ ബസിൽ നിയന്ത്രണം വിട്ട ബൈക്ക് ഇടിച്ച് മൂന്ന് യുവാക്കൾ മരിച്ചു

ആലപ്പുഴ അരൂരിൽ നിർത്തിയിട്ടിരുന്ന സ്‌കൂൾ ബസിന് പിറകിൽ ബൈക്കിടിച്ച് മൂന്ന് യുവാക്കൾ മരിച്ചു. ഇന്ന് പുലർച്ചെയാണ് അപകടമുണ്ടായത്. അഭിജിത്ത്, ആൽവിൻ, ബിജോയ് വർഗീസ് എന്നിവരാണ് മരിച്ചത്. മരിച്ച മൂന്ന് യുവാക്കളും ഒരു ബൈക്കിലാണ് സഞ്ചരിച്ചിരുന്നത്. നിയന്ത്രണം വിട്ട ബൈക്ക് സ്‌കൂൾ ബസിന് പിന്നിൽ ഇടിക്കുകയായിരുന്നെന്നാണ് പ്രാഥമിക നിഗമനം. പ്രദേശത്തെ സിസിടിവി ദൃശ്യങ്ങൾ ഉൾപ്പെടെ പരിശോധിച്ച് അപകടത്തിന്റെ കാരണങ്ങൾ മനസിലാക്കാൻ പൊലീസ് ശ്രമിച്ചുവരികയാണ്. ചന്തിരൂർ സ്വദേശിയായ ഒരാളും അരൂർ സ്വദേശിയായ രണ്ടുപേരുമാണ് മരിച്ചത്. മൂന്ന് സുഹൃത്തുക്കളും അരൂരിലേക്ക് വരുന്നതിനിടെയാണ് അപകടമുണ്ടായത്. മൃതദേഹങ്ങൾ ആശുപത്രിയിലേക്ക് മാറ്റി.