വിജയ് ബാബുവിന് മുൻകൂർ ജാമ്യം

യുവനടിയെ ബലാത്സംഗം ചെയ്ത കേസിൽ വിജയ് ബാബുവിന് മുൻകൂർ ജാമ്യം അനുവദിച്ച് ഹൈക്കോടതി. ജൂൺ 27ന് അന്വേഷണ ഉദ്യോഗസ്ഥന് മുമ്പാകെ ചോദ്യം ചെയ്യലിന് ഹാജരാവാണമെന്ന് കോടതി നിർദേശിച്ചിട്ടുണ്ട്. കേസിന്റെ അന്വേഷണവുമായി സഹകരിച്ചിട്ടുണ്ടെന്നും ഇനിയും കസ്റ്റഡിയിലെടുത്ത് ചോദ്യം ചെയ്യേണ്ട ആവശ്യമില്ലെന്നുമായിരുന്നു വിജയ് ബാബു കോടതിയിൽ വാദിച്ചത്. പരാതിക്കാരിയായ നടി തന്നെ ബ്ലാക്ക്മെയിൽ ചെയ്യുകയാണ്. സിനിമയിൽ അവസരം നിഷേധിക്കപ്പെട്ടതിനെ തുടർന്നാണ് നടി തനിക്കെതിരെ പൊലീസിൽ പരാതി നൽകിയതെന്നും വിജയ് ബാബു ഹർജിയിൽ ചൂണ്ടിക്കാട്ടിയിരുന്നു. മാർച്ച് 16, 22 തീയതികളിൽ വിജയ് ബാബു തന്നെ പീഡിപ്പിച്ചെന്ന നടിയുടെ പരാതിയിലെടുത്ത കേസിലാണ്​ മുൻകൂർ ജാമ്യം കോടതി പരിഗണിച്ചത്​.

എന്നാൽ, ഈ തീയതികൾക്ക്​ ശേഷവും നടിയുമായി തനിക്ക് അടുത്ത സൗഹൃദമുണ്ടായിരുന്നെന്ന് വ്യക്തമാക്കുന്ന വാട്ട്സ്​ആപ്പ് സന്ദേശങ്ങളുടെ പകർപ്പുകളും മറ്റും വിജയ് ബാബു ഹാജരാക്കിയിരുന്നു. പീഡിപ്പിച്ചെന്ന്​ പ്രഥമദൃഷ്‌ട്യാ വിലയിരുത്തിയാലും ഇയാളെ ഈ ഘട്ടത്തിൽ ജയിലിലടക്കണമെന്ന് ആവശ്യപ്പെടുന്നതെന്തിനാണെന്ന് വാദത്തിനിടെ കോടതി ചോദിച്ചു. പുറത്തുനിന്നാൽ പ്രതി സാക്ഷികളെ സ്വാധീനിക്കാനും തെളിവുകൾ നശിപ്പിക്കാനും സാധ്യതയുണ്ടെന്ന്​ നടിയുടെ അഭിഭാഷകൻ വിശദീകരിച്ചിരുന്നു.