ബോളിവുഡും ഹോളിവുഡും ബോക്സ് ഓഫീസിൽ പുതിയ ചരിത്രം കുറിക്കുകയാണ്. ബോളിവുഡിലെ എക്കാലത്തെയും വലിയ ബ്ലോക്ക്ബസ്റ്റർ എന്ന വിശേഷണം ഇതിനകം സ്വന്തമാക്കിയ ചിത്രമാണ് രൺവീർ സിംഗും ആദിത്യ ധറും ഒന്നിച്ച ‘ദുരന്ധർ: ദ റിവഞ്ച്’. വെറും 25 ദിവസങ്ങൾക്കുള്ളിൽ ലോകമെമ്പാടുമായി 1700 കോടി രൂപയാണ് ഈ സ്പൈ ആക്ഷൻ ത്രില്ലർ വാരിക്കൂട്ടിയത്. അല്ലു അർജുന്റെ പുഷ്പ 2ന്റെ റെക്കോർഡുകൾ പോലും ഈ ചിത്രം മറികടക്കുമെന്നാണ് കണക്കുകൂട്ടലുകൾ. എന്നാൽ, സൂപ്പർ താരങ്ങളൊന്നുമില്ലാത്ത ഒരു ഹോളിവുഡ് ആനിമേഷൻ ചിത്രം ദുരന്ധറിന്റെ ഈ സ്വപ്നതുല്യമായ കുതിപ്പിന് അപ്രതീക്ഷിതമായി തടയിട്ടിരിക്കുകയാണ്.

ആരോൺ ഹോർവാത്തും മൈക്കൽ ജെലെനിക്കും സംവിധാനം ചെയ്ത് മാത്യു ഫോഗൽ തിരക്കഥയൊരുക്കിയ ‘ദി സൂപ്പർ മാരിയോ ഗാലക്‌സി മൂവി’ വെറും 13 ദിവസങ്ങൾക്കൊണ്ടാണ് ഈ കണക്കുകളെ നിഷ്പ്രഭമാക്കിയത്. 2023ൽ പുറത്തിറങ്ങിയ സൂപ്പർ മാരിയോ ബ്രദേഴ്സിന്റെ രണ്ടാം ഭാഗമായ ഈ ചിത്രം ഏപ്രിൽ ഒന്നിനാണ് തിയേറ്ററുകളിലെത്തിയത്. 110 മില്യൺ ഡോളർ മുതൽമുടക്കിൽ നിർമ്മിച്ച ഈ ചിത്രം ഇതിനോടകം 629 മില്യൺ ഡോളർ, അതായത് ഏകദേശം 5874 കോടി രൂപയാണ് സ്വന്തമാക്കിയത്. മൂവായിരം കോടിക്ക് മുകളിൽ കളക്ഷൻ നേടിയ ദുരന്ധർ ഫ്രാഞ്ചൈസിയുടെ ആകെ തുകയെക്കാൾ കൂടുതലാണിത്. ആഗോളതലത്തിൽ സിനിമകൾ ഇത്തരത്തിൽ കോടികൾ വാരിക്കൂട്ടുമ്പോഴും പുതിയ പ്രഖ്യാപനങ്ങൾ അതിവേഗം നടക്കുമ്പോഴും, മലയാളത്തിൽ നിന്നുള്ള ഒരു ബ്രഹ്മാണ്ഡ ചിത്രത്തിന്റെ വിവരങ്ങളറിയാൻ അക്ഷമരായി കാത്തിരിക്കുകയാണ് പ്രേക്ഷകർ.

കത്തനാർ എവിടെ?

മലയാളത്തിലെ ഏറ്റവും ചെലവേറിയ സിനിമയെന്ന ഖ്യാതിയോടെ പ്രഖ്യാപിക്കപ്പെട്ട ജയസൂര്യ ചിത്രം ‘കത്തനാർ: ദി വൈൽഡ് സോർസറർ’ ആണ് ആ വലിയ കാത്തിരിപ്പിന് കാരണം. മൂന്ന് വർഷമായി സിനിമാലോകം ഈ ചിത്രത്തിനായി കാത്തിരിക്കുന്നു. രണ്ട് ഭാഗങ്ങളിലായി പുറത്തിറങ്ങുമെന്ന് പ്രഖ്യാപിച്ച സിനിമയുടെ ആദ്യ ഭാഗം 2024ൽ എത്തുമെന്നായിരുന്നു ആദ്യം വന്ന വാർത്തകൾ. എന്നാൽ റിലീസ് സംബന്ധിച്ച് യാതൊരു വിവരവും ഇതുവരെ ലഭ്യമല്ല. ചിത്രീകരണം പൂർത്തിയായ വിവരം നായകൻ തന്നെ മുൻപ് സമൂഹ മാധ്യമങ്ങളിലൂടെ പങ്കുവെച്ചിരുന്നു. കത്തനാർ പരമാവധി മികവിൽ പ്രേക്ഷകർക്ക് മുമ്പിൽ എത്തിക്കാൻ ശ്രമിച്ചിട്ടുണ്ടെന്നും നിർമ്മാതാവായ ഗോകുലം ഗോപാലനോട് പ്രത്യേക നന്ദിയുണ്ടെന്നും ജയസൂര്യ അന്ന് കുറിച്ചിരുന്നു. ഇതിനിടയിൽ നായകൻ ജയസൂര്യയ്ക്കെതിരെ ഉയർന്ന ചില കേസുകളാണോ സിനിമ വൈകാൻ കാരണമെന്ന സംശയവും സോഷ്യൽ മീഡിയയിൽ ഇപ്പോൾ പലരും ഉന്നയിക്കുന്നുണ്ട്.

അണിയറയിലെ ബ്രഹ്മാണ്ഡം

കടമറ്റത്ത് കത്തനാരുടെ ജീവിതകഥ പറയുന്ന ഈ ഫാന്റസി ത്രില്ലർ സംവിധാനം ചെയ്യുന്നത് റോജിൻ തോമസാണ്. ഫിലിപ്‌സ് ആൻഡ് ദ മങ്കിപെൻ, ഹോം തുടങ്ങിയ ഹിറ്റ് ചിത്രങ്ങൾക്ക് ശേഷം റോജിൻ ഒരുക്കുന്ന ഈ വലിയ കാൻവാസ് ചിത്രത്തിനായി ആറ് വർഷത്തിലേറെ നീണ്ട ചർച്ചകളാണ് നടന്നത്. രണ്ട് വർഷം മുൻപാണ് പ്രീ-പ്രൊഡക്ഷൻ ജോലികൾ ആരംഭിച്ചത്. ബോളിവുഡ് താരം അനുഷ്ക ഷെട്ടിയാണ് ചിത്രത്തിൽ നായികയായി എത്തുന്നത്. കൂടാതെ, 33 വർഷത്തെ വലിയൊരു ഇടവേളയ്ക്ക് ശേഷം പത്മരാജന്റെ ഗന്ധർവനായി മലയാളികളുടെ മനസ്സിലിടംനേടിയ നിതീഷ് ഭരദ്വാജ് മലയാളത്തിലേക്ക് തിരിച്ചെത്തുന്നു എന്ന പ്രത്യേകതയും ഈ ചിത്രത്തിനുണ്ട്. തമിഴ് നടൻ പ്രഭുദേവയും ഒരു പ്രധാന വേഷത്തിൽ സിനിമയുടെ ഭാഗമാകുന്നുണ്ട്.

ചെന്നൈ, റോം, കൊച്ചി എന്നിവിടങ്ങളിലായാണ് കത്തനാരുടെ ചിത്രീകരണം പ്രധാനമായും നടന്നത്. ഏതാണ്ട് 45000 ചതുരശ്ര അടി വിസ്തീർണമുള്ള മോഡുലാർ ഫ്ലോറിലായിരുന്നു സിനിമയുടെ സുപ്രധാന രംഗങ്ങൾ ചിത്രീകരിച്ചത്. കൊറിയൻ വംശജനും കനേഡിയൻ പൗരനുമായ ജെ ജെ പാർക്ക് ആണ് സ്റ്റണ്ട് കൊറിയോഗ്രാഫി നിർവഹിച്ചിരിക്കുന്നത്. കഴിഞ്ഞ വർഷം പുറത്തുവന്ന സിനിമയുടെ ഗ്ലിംപ്‌സ് വീഡിയോ ചിത്രം ഒരു വലിയ ദൃശ്യവിസ്മയം തന്നെയാകുമെന്ന സൂചനയാണ് നൽകിയത്. മലയാളം, ഹിന്ദി, ഇംഗ്ലീഷ്, ചൈനീസ്, കൊറിയൻ, റഷ്യൻ ഉൾപ്പെടെ മുപ്പതിലധികം ഭാഷകളിലായി ആഗോള തലത്തിൽ ചിത്രം റിലീസ് ചെയ്യാനാണ് അണിയറപ്രവർത്തകർ ലക്ഷ്യമിടുന്നത്. ഈ വലിയ ക്യാൻവാസിൽ ഒരുങ്ങുന്ന അത്ഭുതത്തിനായി ഇനി എത്രനാൾ കൂടി കാത്തിരിക്കണം എന്ന ചോദ്യം മാത്രമാണ് പ്രേക്ഷകർക്ക് മുന്നിൽ ബാക്കിയുള്ളത്.