ഗംഭീര പ്രകടനവുമായി അക്ഷയ് കുമാർ ചിത്രം ഭൂത് ബംഗ്ലാ തിയേറ്ററുകളിൽ വിജയക്കുതിപ്പ് തുടരുകയാണ്. റിലീസ് ചെയ്ത് വെറും നാല് ദിവസങ്ങൾക്കുള്ളിൽ തന്നെ ചിത്രം ആഗോള തലത്തിൽ 100 കോടി ക്ലബ്ബിൽ ഇടംനേടിക്കഴിഞ്ഞു. പ്രിയദർശൻ സംവിധാനം ചെയ്ത ഈ ഹൊറർ കോമഡി ചിത്രം മികച്ച ഓപ്പണിങ് വാരാന്ത്യത്തിന് ശേഷം തിങ്കളാഴ്ചയും ബോക്‌സ് ഓഫീസിൽ സ്ഥിരതയാർന്ന പ്രകടനമാണ് കാഴ്ചവെച്ചത്. സാക്നിൽക്കിന്റെ റിപ്പോർട്ടുകൾ പ്രകാരം നാലാം ദിവസം 10,984 ഷോകളിൽ നിന്നായി 6.75 കോടി രൂപയാണ് ചിത്രം സ്വന്തമാക്കിയത്. ഇതോടെ ഇന്ത്യയിലെ ആകെ നെറ്റ് കളക്ഷൻ 64.75 കോടിയായി ഉയർന്നു. 77.34 കോടി രൂപയാണ് ഇന്ത്യയിലെ ഗ്രോസ് കളക്ഷൻ.

പെയ്ഡ് പ്രിവ്യൂകളിലൂടെ 3.75 കോടി രൂപ നേടിയ ചിത്രം ആദ്യ ദിവസം 12.25 കോടിയും, രണ്ടും മൂന്നും ദിവസങ്ങളിൽ യഥാക്രമം 19 കോടിയും 23 കോടിയുമാണ് സ്വന്തമാക്കിയത്. വിദേശ മാർക്കറ്റുകളിലും ചിത്രത്തിന് മികച്ച സ്വീകാര്യതയാണ് ലഭിക്കുന്നത്. നാലാം ദിവസം 2.50 കോടി രൂപ കൂടി നേടിയതോടെ ആകെ വിദേശ കളക്ഷൻ 29 കോടിയായി. നിലവിൽ 106.34 കോടി രൂപയാണ് ചിത്രത്തിന്റെ ആഗോള ഗ്രോസ് കളക്ഷൻ.

താരനിരയും മറ്റ് തിയേറ്റർ വിശേഷങ്ങളും

പരേഷ് റാവൽ, വാമിഖ ഗബ്ബി, തബു, രാജ്‌പാൽ യാദവ്, മിഥില പാൽക്കർ, ജിഷു സെൻഗുപ്ത, രാജേഷ് ശർമ്മ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. പ്രശസ്ത നടൻ അസ്രാണി അവസാനമായി വെള്ളിത്തിരയിൽ എത്തിയ ചിത്രം കൂടിയാണിത് എന്ന പ്രത്യേകതയുമുണ്ട്. 2010ൽ പുറത്തിറങ്ങിയ ‘ഖട്ട മീത്ത’യ്ക്ക് ശേഷം നീണ്ട 16 വർഷങ്ങളുടെ ഇടവേള അവസാനിപ്പിച്ചാണ് അക്ഷയ് കുമാറും പ്രിയദർശനും ഈ ചിത്രത്തിലൂടെ വീണ്ടും ഒന്നിക്കുന്നത്.

അതേസമയം, തിയേറ്ററുകളിൽ വലിയ തരംഗം സൃഷ്ടിച്ച ആദിത്യ ധറിന്റെ സ്പൈ ത്രില്ലർ ചിത്രം ‘ദുരന്ധർ: ദി റിവഞ്ച്’ ബോക്‌സ് ഓഫീസിൽ അല്പം പിന്നോട്ട് പോയിട്ടുണ്ട്. രൺവീർ സിംഗ് നായകനായ ഈ ചിത്രം 33-ാം ദിവസം 1.62 കോടി രൂപയാണ് നേടിയത്. ഇതോടെ ഇന്ത്യയിലെ ആകെ കളക്ഷൻ 1,117.29 കോടി രൂപയായി. 1,337.84 കോടിയാണ് ഗ്രോസ് കളക്ഷൻ.

ഒടിടിയിൽ വിരുന്നൊരുക്കി പുതിയ ചിത്രങ്ങൾ

തിയേറ്ററുകൾക്ക് പുറമെ ഡിജിറ്റൽ പ്ലാറ്റ്‌ഫോമുകളിലും ഈ ആഴ്ച സിനിമകളുടെ ചാകരയാണ്. ആക്ഷനും ത്രില്ലറും പ്രണയവുമെല്ലാം കോർത്തിണക്കിയ നിരവധി ചിത്രങ്ങളാണ് വീടിന്റെ സ്വീകരണമുറിയിൽ പ്രേക്ഷകരെ കാത്തിരിക്കുന്നത്. ഇതിൽ ഏറെ ശ്രദ്ധേയമായ ഒന്നാണ് നെറ്റ്ഫ്ലിക്സിൽ സ്ട്രീമിങ് ആരംഭിച്ച ‘തേരെ ഇഷ്ക് മേൻ’. ആനന്ദ് എൽ റായ് സംവിധാനം ചെയ്ത ഈ ചിത്രത്തിൽ ധനുഷും കൃതി സനോണുമാണ് പ്രധാന കഥാപാത്രങ്ങളെ അവതരിപ്പിക്കുന്നത്. ഫ്ലൈറ്റ് ലെഫ്റ്റനന്റായ ശങ്കറായി ധനുഷ് എത്തുമ്പോൾ, സൈക്കോളജിസ്റ്റായ മുക്തി എന്ന കഥാപാത്രത്തെയാണ് കൃതി അവതരിപ്പിക്കുന്നത്. പ്രണയവും പ്രതികാരവും ഇഴചേരുന്ന ഒരു മികച്ച അനുഭവമാണ് ചിത്രം സമ്മാനിക്കുന്നത്.

സസ്പെൻസ് ത്രില്ലറുകളും ചരിത്ര യാഥാർത്ഥ്യങ്ങളും

ജനുവരി 23 മുതൽ ആമസോൺ പ്രൈമിൽ സ്ട്രീമിങ് ആരംഭിച്ച ‘ചീകറ്റിലോ’ ആണ് മറ്റൊരു പ്രധാന റിലീസ്. ശരൺ കോപിഷെട്ടി സംവിധാനം ചെയ്ത ഈ ക്രൈം സസ്പെൻസ് ത്രില്ലറിൽ ശോഭിത ധൂലിപാല, വിശ്വദേവ് രചകൊണ്ട, ചൈതന്യ വിശാലക്ഷ്മി എന്നിവർ മുഖ്യ വേഷങ്ങളിൽ എത്തുന്നു. ഹൈദരാബാദ് പശ്ചാത്തലമാക്കുന്ന സിനിമ പറയുന്നത് സന്ധ്യ എന്ന പെൺകുട്ടിയുടെ കഥയാണ്. ക്രിമിനോളജി ബിരുദധാരിയും ട്രൂ-ക്രൈം പോഡ്‌കാസ്റ്ററുമായ അവൾ ഇരുപത് വർഷം മുൻപ് നടന്ന ഒരു കൊലപാതകത്തിന്റെ അന്വേഷണത്തിൽ അപ്രതീക്ഷിതമായി ചെന്നുപെടുന്നതും തുടർന്നുള്ള നീതിക്കായുള്ള പോരാട്ടങ്ങളുമാണ് സിനിമയുടെ ഇതിവൃത്തം.

ഇവയ്ക്ക് പുറമെ യഥാർത്ഥ സംഭവങ്ങളെ അടിസ്ഥാനമാക്കി ഒരുക്കിയ ‘സ്പെയ്സ് ജെൻ: ചന്ദ്രയാൻ’ എന്ന സീരീസും പ്രേക്ഷകരുടെ മുന്നിലെത്തിയിട്ടുണ്ട്. ജനുവരി 23 മുതൽ ജിയോ ഹോട്ട്സ്റ്റാറിലൂടെയാണ് ഇത് പ്രദർശനം ആരംഭിച്ചത്. നകുൽ മേത്ത, ശ്രിയ ശരൺ എന്നിവർ പ്രധാന വേഷങ്ങളിലെത്തുന്ന ഈ സീരീസ് രാജ്യത്തിന്റെ അഭിമാന നിമിഷങ്ങളെയാണ് വരച്ചുകാട്ടുന്നത്. ചന്ദ്രയാൻ-2 ദൗത്യത്തിന്റെ പരാജയത്തിൽ നിന്ന് പാഠമുൾക്കൊണ്ട് ചന്ദ്രയാൻ-3യെ ചന്ദ്രന്റെ ദക്ഷിണധ്രുവത്തിൽ വിജയകരമായി ഇറക്കുന്നത് വരെയുള്ള ഐഎസ്ആർഒയുടെ ചരിത്രപരമായ യാത്രയാണ് ഈ സീരീസിന്റെ പ്രമേയം.